khabarbat News Network
नवी दिल्ली : काही मिनिटांच्या प्रवासाला ट्रॅफिकमुळे दोन-दोन तास उशीर होतो. पण, आता या ट्रॅफिकचे टेन्शन मिटणार आहे. दिल्लीत आयोजित करण्यात आलेला इंडिया मोबिलिटी ग्लोबल एक्स्पो अनेक प्रकारे खूप खास आहे. यावेळी, अनेक कार, बाईक आणि व्यावसायिक वाहने सादर करण्यात आली.
या एक्स्पोमध्ये विमान वाहतूक क्षेत्रातील कंपन्यांनीही उत्साहाने सहभाग घेतला आहे. या प्रदर्शनात बंगळुरूस्थित एरोस्पेस स्टार्टअप सरला एव्हिएशनने त्यांचा प्रोटोटाइप एअर टॅक्सी शून्य देखील प्रदर्शित केला आहे. या एअर टॅक्सीमधून सहा जण प्रवास करु शकणार आहेत. यामुळे रस्त्यावर असणा-या ट्राफिकपासून मोठा दिलासा मिळणार आहे.
हे एक ‘ई-व्हीटोल’ (इलेक्ट्रिक व्हर्टिकल टेक-ऑफ आणि लँडिंग) वाहन आहे. ते एअर टॅक्सी म्हणून वापरले जाईल. वाहतूक कोंडी असलेल्या महानगरांसाठी ही हवाई टॅक्सी एक अतिशय उपयुक्त साधन म्हणून पाहिली जात आहे. शहरी हवाई वाहतूक सुरू करण्यासाठी कंपनी २०२८ पर्यंत बंगळुरूमध्ये इलेक्ट्रिक फ्लाइंग टॅक्सी सुरू करण्याचे नियोजन करत आहे.
६ जण प्रवास करु शकणार
सध्या, कंपनीने झिरोचा प्रोटोटाइप सादर केला आहे आणि उत्पादनासाठी तयार मॉडेलपर्यंत पोहोचताना त्यात अनेक बदल दिसून येतात. ही एअर टॅक्सी ताशी २५० किमी वेगाने हवेत उडू शकते. हे आधुनिक बॅटरी तंत्रज्ञानासह १६० किमीसाठी डिझाइन केलेले आहे आणि २५-३० किमी प्रवास करण्यास सक्षम आहे. त्यात ६ प्रवासी आणि एक ड्रायव्हर एकत्र बसू शकतात. ही हवाई टॅक्सी जास्तीत जास्त ६८० किलो वजन उचलण्यास सक्षम आहे.
अत्याधुनिक तंत्रज्ञानाने युक्त
या एअर टॅक्सीचे केबिन अ‍ॅडव्हान्स फिचर्सने आणि तंत्रज्ञानाने सुसज्ज असणार आहे. ६-सीटर आणि ४-सीटर कॉन्फिगरेशन व्यतिरिक्त, ते मालवाहू वाहन म्हणून देखील कस्टमाइझ केले जाऊ शकते. हे फक्त प्रवासी वाहन म्हणून वापरले जाणार नाही तर मालवाहू वाहन म्हणून देखील वापरले जाऊ शकते. हे इ-व्हीटोल वाहन असल्याने, हवेत उड्डाण करण्यासाठी त्याला मोठ्या धावपट्टीची आवश्यकता नाही. ते त्याच्या जागेवरूनच थेट हवेत उडू शकते.
