संभाजीनगर : प्रतिनिधी
लोकसभा आणि विधानसभा निवडणुकांनंतर, २०२५ मध्ये होणा-या छत्रपती संभाजीनगर महापालिका निवडणुकीसाठी भाजप, शिवसेना शिंदे गट आणि उद्धव ठाकरे गट तयारीत आहेत. शिवसेना शिंदे आणि ठाकरे गट स्वबळावर निवडणूक लढवण्याचा विचार करत आहे, तर भाजपनेही स्वबळावर लढण्याची रणनिती आखली आहे. ठाकरे गटही स्वतंत्रपणे निवडणूक लढविण्याचा निर्धार करत आहे.
राज्यभरातील स्थानिक स्वराज्य संस्थांच्या निवडणुकीकडे सर्वच राजकीय पक्षांचे लक्ष लागले आहे. गेल्या चार वर्षांपासून छत्रपती संभाजीनगर महापालिका निवडणूक झालेली नाही. आता २०२५ मध्ये महापालिका निवडणूक होईल, अशी सध्यातरी शक्यता आहे. उद्धव बाळासाहेब ठाकरे यांची शिवसेना सोडली तर, भाजपा आणि शिवसेना शिंदे गट यांनी विधानसभेला मोठे यश मिळाल्याने आता दोघांची भाषा बदलली असून छत्रपती संभाजीनगर महापालिका स्वबळावर लढणार असल्याचे त्यांचे वक्तव्य समोर आले आहे.
भाजपला युतीचा प्रस्ताव देणार : राजेंद्र जंजाळ
शिवसेना शिंदे गटाचे जिल्हाप्रमुख राजेंद्र जंजाळ यांनी याबाबत महत्त्वाची माहिती देताना म्हटले, ‘‘महापालिका निवडणुकीची आमची तयारी झाली आहे, निवडणूक कधीही लागो आम्ही तयार आहोत, आणि महापालिका जिंकण्याच्या दृष्टीने आमचे नियोजन पूर्ण झालेले आहे. तसेच आमच्या पक्षात उबाठा गटाचे काही नगरसेवक येण्याच्या तयारीत आहेत. पण ते घेताना त्यांची क्षमता बघून आम्ही त्यांना प्रवेश देणार आहोत. भाजपने महापालिका स्वतंत्र लढावी का? हा त्यांचा प्रश्न असला तरी, जातीयवाद्यांच्या हातात सत्ता जाऊ नये म्हणून आम्ही भाजपला युतीचा प्रस्ताव देणार आहोत. पण त्यांनी मान्य केले नाही तर आमची तयारी पूर्ण झालेली आहे. महापालिका निवडणुकीत भाजपसोबत असो किंवा नसो, छत्रपती संभाजीनगर महापालिकावर भगवा झेंडा रोवण्यासाठी आम्ही सज्ज झालो आहोत.’’
भाजपची स्वबळावर लढण्याची तयारी
भाजपचे जिल्हाध्यक्ष शिरीष बोराळकर यांनी देखील महापालिका निवडणुकीबाबत महत्त्वाची प्रतिक्रिया देताना म्हटले, ‘‘छत्रपती संभाजीनगर महापालिका निवडणुकीसाठी आमची तयारी खूप चांगली आहे, आमची तयारी बूथ पर्यंत झाली आहे. याचा फायदा महायुतीचे आणि शिवसेना शिंदे गटाचे उमेदवार संदीपान भुमरे यांना झाला. तसेच जिल्ह्यात नऊच्या नऊ उमेदवार महायुतीचे आलेले आहेत. छत्रपती संभाजीनगर शहरात भाजपची ताकद गेल्या चार वर्षात चांगली वाढली आहे, आणि म्हणून महापालिका निवडणूक आम्ही स्वबळावर लढली पाहिजे, अशी आमच्या कार्यकर्त्यांची इच्छा आहे, आणि तशी संधी आम्ही कार्यकर्त्यांना देणार आहोत. तसेच आमचा आलेख वाढता आहे. महायुतीत आम्ही मोठे भाऊ आहोत, हे मागच्या दोन वेळा सिद्ध झालेले आहे. आम्ही छत्रपती संभाजीनगर महापालिका स्वतंत्रपणे लढण्यासाठी आमचे नेते चंद्रकांत बावनकुळे आणि मुख्यमंत्री देवेंद्र फडणवीस यांना विनंती केली आहे. मात्र निवडणुकीनंतर आम्ही एकत्र येऊ’’, अशी प्रतिक्रिया भाजप जिल्हाध्यक्ष शिरीष बोराळकर यांनी दिली.
एकट्याने लढू : ठाकरे गटाची भूमिका
शिवसेना उद्धव बाळासाहेब ठाकरे पक्षाचे नेते चंद्रकांत खैरे यांनी देखील याबाबत प्रतिक्रिया दिली. ते म्हणाले, ‘‘आमच्या सर्व शिवसैनिक आणि नगरसेवकांचे म्हणणे एकच आहे. आपण एकट्याने लढले पाहिजे. आम्ही पक्षप्रमुख उद्धव ठाकरे यांचा आदेश येईल त्याप्रमाणे करू, मात्र आम्ही उद्धव ठाकरे यांना सांगितले आहे, आपण एकटेच लढू’’, असं चंद्रकांत खैरे म्हणाले.
